أن يدخلني ربِّي الجنة .. هذا أقصى ما أتمنَّى
:)

شعب عايز يقطف بدري !

تنزل الشارع تلاقي واحد مسن بيسب ف الثورة علشان اتزق في طابور العيش و يقولك آدي بلطجة الثورة !
تركب الميكروباص أبو نص جنيه تلاقي سوَّاقه اللي مبلطج على خلق الله طول النهار بيفتي في مستقبل البلد ويتهم ناس هو ميعرفش 3 كلمات عنهم بالخيانة و اللاوطنية !
تنزل من الميكروباص وتعدِّي على حارة ضيَّقة تلاقي واحدة سِت بتنشر غسيلها بتودود مع جارتها اللي مستنية في البلكونة ابنها ييجي من المدرسة على حال البلد الواقف بسبب الثورة وسعر الطماطم اللي غلي و السكر اللي مش لاقيينه !
تنفَّض وتسرع خطواتّك نحو بيتك تلاقي اتنين ناويين ياكلوا بعض واحد من بتوع احنا اسفين يا ريس و التاني من حزب آخر وكلاهما يتهم الاخر بنفس الاتهامات بغوغائية وهمجية شديدة !
وتلاقي واحد بيحوش بينهم بيقول الله يقطع الثورة ع اليوم اللي شفناها فيه !
صوت بداخلك يريد أن يكسِّر ضلوعَك ويخرج للنور ويقول : ياللي ظلمتوا الثورة وقولتوا وعدتوا عليها ! العيب فيكوا مش ف الثورة ..
تهرول وتندفع باتجاه باب بنايتك .. وتطلع السلالم وتخش البيت يستقبلك ابوك بسخط شديد ؟!
كنت فين يا فالح النهاردة أجازة و الكليات قافلة !
معلش يابابا كنت ف التحرير باطمن ع الناس هناك و كده ...
يادي التحرير و اللي خدناه من التحرير .. يبني مالك انت بالسياسة وهم السياسة يابني ريح دماغك دي و ركز ف مستقبلك خليك تعرف تبني نفسك صح ومفيش حاجة تعطلَّك ! من شهر واحد وانت ع الحال دي ارحمني بقى انا مبقتش حمل مناهدة !
يا بابا ... تقاطعك نظرة والدك بأن " ألِّم الدور بقى " !
حاضر يابابا .. " أقولها غير مقتنعاً " رضاءً لأبي و راحةً لدماغي ودماغ أمِّي !! و أذهب لمواقع النت و برامج التلفاز أرى الناس تزج بالثورة في غير مواضعها و أي حاجة تحصل لازم تتحط في جملة مفيدة ؟!!
أخش انام وأنا متكدَر من اللي باشوفه أصحى و أقوم أتصفح صفتي الشخصية على شبكة التواصل الإجتماعي " فيس بوك "
فألقى صديقاً لي متزوِّج حديثاً وصار لي مدة لم أراه !
أهلاً يا فلان .. أهلان يا علان .. الاخبار ! .. كذا كذا كذا رغي ملتوت ملوش لزمة دباجاة في كلام الاصحاب ..
- مبنشفكش ياعم فينك ؟!
-- بس بقى يا محمد ده بقت بلد ..... " لفظ نابي "
- ليه ياعم ايه اللي حصل !
-- قالك ثورة ثورة مين ياعم !!
- ده بقت أو ...... تييييييييييت " لفظ نابي مماثل " عن الأول !
-- شوية ورق يطلع عين أمي عشان أخلصهم وياريتهم بيخلصوا وكل اللي يعرف انك مسافر يفتكرك ياما هنا يا ما هناك وهاتك يا استغلال !
- معلش يا فلان البلد مش هتتغير من يوم وليلة !
-- يعني هو كان ايه اللي حصل ؟!
- حصل ان مبارك أسقط هو نظامه و محلياته !
انا عارف ان ده مش كفاية بس لازم نستحمل مش 360 درجة البلد هتتصلح من 30 سنة خراب ! لازم نستحمل
أنا زهقت بصراحة ومش شايف فيه حاجة بتحصل محتاجين ثورة بجد البلد مليانة ........... تييييييييت !
حينها غضبي و يأسي وصلا للـ Peak بتاعهم .. تنهدت وكتبت له !
بص يابني هم الـ تيييييييييييييت ! دول مش كانوا موجودين قبل 25 يناير !
آه
لو ماقامتش الثورة .. كانوا هيمشوا ؟!
لأ
ولا حتى بعد إسقاط مبارك ؟!
دي أنماط شخصية و أساليب تعامل محتاجة ثورة في النفس مش نظام يسقط وييجي .. محتاجة جهود وجهود جامدة كمان محتاجة مواقف بس مش تأفف و لعن ! في سنتين تلاتة اوعدك هتلاقي تغيير ! أصل انا وانت برضه جزء من الدائرة ..
مانت متقنعنيش ان احنا مبنفسدش وش بنفسد ولو بجزء ضئيل
once كسرنا الدائرة دي و بدانا نصلح المنظومة هتتعدل وعمر التأفف و لعن الماضي ما هيبني حاجة ..
فالثمار تأخذ كثيراً كي تنضج .. فليس من المعقول أن الشعب يبقى عايز يقطف بدري من غير ما يروي و يسمِّد و يرعى زرعه !
قفلنا ع الموضوع و أنا في ذاتي يقين من أن الفرج آتٍ آتٍ لا محالة !
اللي باركلنا في اسقاط نظام دام ظلمه 30 سنة بحالهم في نص شهر قادر على انه يعينا على اسقاط الأنظمة التي بداخِلنا ...

بس .

كلمات لا تحتاج لوصف فهي معبرة بتلقاء نفسها

‎" الشعب المصري أستاذ يقدم محاضرته الكبرى: كل عرش عربي منذ اليوم قد يصبح قفصاً "
مريد البرغوثي ...

محكمة !!

النيابة العامة: المتهم محمد حسني السيد مبارك
المتهم : أفندم
قشعريرة انتابتني فور سماع تلك الجملة !
المجد للشُهداء
دم الشهداء يسطِّر مجلدات الحرية والعظمة ..

استفزاز في استفزاز

هم ضباط الشرطة العسكرية اللي مؤمِّنين خروج المتهمين .. إيه الحفاوة و السلامات والابتسامات دي اللي بيستقبلوهم بيها ؟!
هم لسه مش متخيلين الوضع , إن دول مبقوش زي زمان !
صباح الاستفزاززززززز ؟!!
يعني ايه متهم طالع اسلم عليه بالمنظر ده واحس اني في املة اكن شيكابالا طالع او محمد بركات .. نفسي مش سايعاني !
بجد المنظر ده قفلني قفلة بعد المحاكمة كما افلني بالضبط غطرسة جماااال وفشة العادلي العايمة ولا أكنه طالع من فيلم كوميدي لعلي الكسَّار !

مسقط رأسي وقت المغربية !

مشهد رمضاني بديع :

ساعة الفطار .. قام شاب يوزع تمر وعصائر على ركاب الميكروباص .. لحد ما وصل للي جنبي .. اللي جنبي قاله متشكر أوي أنا مسيحي، فـرَّد الشاب اللي بيوزع : يعني أنا اللي مسلم !!
| دي مصر الرائعة |

By : محمد عادِل

+18

+18

لا للمواقع الإباحية ! إنترنت آمن !! حملة قام بتدشينها الكثيرون من قبل منذ أكثر من سنة , وتهدف إلى فلترة مواقع الويب من أية مواد إباحية عن طريق خدمة البروكسي .. خطوة ممتازة في المقام الأول .. وكما كانت تونس صاحبة الريادة في أمور كثيرة
فهي السبَّاقة دوماً وطول عمرها كانت الإجابة ! , فها هي سبقتنا الى هذا القرار و أصدرت ما يشبه بقانون غلق تلك المواقِع المُخِلَّة للآداب المجتمعية ..
توقفت لبرهة وأدمت التفكير للحظات , فوجدت أن الإنترنت بما يحويه من وثائق فلمية و داتا جبارة تحوي أسلحة مجنمعبة هدامة أكثر بكثير من الفيلم الجنسي الذي يخشى الأب على ولده أن تراه عيناه البريئتان !
الإنترنت فيه مواقع شذوذ !! " ياعم ما قولنا هتتقفل خلاص ؟!! "
لا لا انت مش فاهم !!
الشذوذ اللي اقصده هنا هو الشذوذ الفكري .. السموم الفكرية اللي بتنتقل ف ثوان عبر المواقع أسرع من انتشار النار في الهشيم لو اللي قدامك مش داري باللي حواليه دراية كافية سهل جدَّاً السيطرة على عقليته ومعتقداته و أفكاره وتوجيهها أينما تشاء !
الدعارة الفكرية المقنعة التي أراها بعيني يوميَّاً على هيـئة مقالات هدَّامة , أخبار مغلوطة , إشاعات مغرضة , أفكار ومعتقدات لا تمت بالدين ولا للسياسة القويمة التي ينشدها الجميع باختلاف شاكلنهم بصلة هدفها زعزعة استقرار الوطن في أحرج لحظات ننشد فيه الأمن والرزانة من الجميع
كل هذا وذاك أخطر بمراحِل من تلك المقاطِع الإباحية التي تخترق بيوتنا !
إذاً ما الحل ؟!
هل نقوم بحجب كل ما يتعارض مع قيم مجتمعنا وأدياننا وعادتنا الشرقية !!!
صندوق التفاح اللي فيه ثمرة فاسِدة لا يلقى بأكمله في سلَّة المهملات ؟!!!
أكيد مش هو ده الحل – ع الأقل في رأيي ومخيلتي أنا - !
في الحقيقة الحل هو حل مشاكِل كتير بنعيشها يومياً
الحل هو حل استئثار شريحة ليست بالقليلة من رجال الدين المتحذلقين بعقول العامة وتوجيههم برؤى عقيمة عازفين على أوتار الدين بجدارة أحقر المعزوفات !
الحل هو حل عزوف البسطاء من أبناء هذا الوطن عن المطالبة بأبسط حقوقه في الحياة الكريمة والاكتفاء بانتظار الهبات والعلاوات الملكية ومشاركة الشارع سياسة البلد خطوة بخطوة !
الحل هو حل سكوت طالب الجامعة المطحون عن سخافة دكتور " مع الاعتذار للقب !" جامعي جاهل مريض لمجرد إن بسلامته خد درجة علمية وافتقد أقل درحات أخلاق تلك الدرجة !
الحل هو حل الانصياع لاستغلال التجَّار والباعة حتى في أحلك الظروف اللي كنت وكان كل مصري شريف بينزل من بيته يقول " لأ " و " إرحل " في ميدان التحرير , ألاقيك يا عزيزي بتستغلني في مأكلي ومشربي وأنا باقول في سرَّي : " جتك القرف ياريتني اعرف ازيحك مع النظام يا فاسِد !! "
الحل هو " الوعي " .. الوعي اللي لازم الأب والأم والأسرة كلها تغرسه في نفوس ولادها من البيت .. الحل هو الجرأة في مناقشة الأمور الشائكة مع الأبناء بدون حساسيات وخجل وعدم ترك النشء فريسة لأفكار أصدقاء السوء والمواقع الهدَّامة , كذلك ثقافة مجابهة الأفكار الخارجية اللي بتتطفل على عقولنا من كل جانب .
يطلع الواد والبِت عارفين يميِّزوا !!
الصح من الغلط , اللي يتعمل من العيب, اللي يصح من اللي ما يصحش !
يمنعوا إباحية الفِكر زي ما هيستنكروا إباحية الجسد ..
صدقوني مش كل قيمة حلوة في حياتنا عايزنلها قانون علشان نعيش بيها !
القانون الصح هو " عقلي وعقلك المستنير " اللي يحطوا مليون قانون ويشرعوا الدساتير ويجعلوا من مصر إن شاء الله خير بلاد الأرض كما كانت وستبقى .

بس !

كتبها : محمد إبراهيم عبدالرحمن